薑汁焗燉蛋白鮮奶

五至六碗既份量。

材料：
鮮奶 750ml
蛋白 6隻
薑汁 3湯匙
糖 3湯匙

做法：
1. 預熱焗爐180度。
2. 用細火將鮮奶加熱。
3. 將蛋白、糖及薑汁拌勻，然後將鮮奶慢慢拌入蛋白內，過濾後倒入耐熱碗內。
4. 將碗排放在焗盤內，注入暖水至半滿，放入焗爐燉約30分鐘至凝結便成。
5. 如凍吃的話，可放雪櫃冷凍3小時。

磨菇雞絲意大利飯 Portabello Mushroom Chicken Risotto

材料:
茴香(切粒) 1個
洋蔥(切粒) 半個
乾荵(切粒) 1粒
蒜頭(切粒) 2粒
橄欖油 4湯匙
Portabello菇(切片) 1個
大雞脾肉(切粗絲) 1隻
risotto米 1杯
白酒 1/4杯
雞湯 750ml
番茄(切粒) 半個
牛油 1茶匙
Parmesan cheese 1/6杯

做法:
1. 將雞湯倒入麵煲用細火加熱後離火備用。
2. 中細火燒熱平底鑊後加入兩湯匙橄欖油，將Portabello菇炒至軟身倒起備用。
3. 將剩下既橄欖油倒落平底鑊，將茴香粒、洋蔥粒、乾荵粒及蒜頭粒炒至軟身，加入雞脾肉爆一爆後倒入risotto米，快手炒直至米身變成微微既金黃色，加入白酒讓米及雞肉吸收。
4. 將1/4既雞湯倒入米內，讓米將雞湯吸收，其間要一直搞拌。
5. 重複步驟4直至所有雞湯被米吸收。
6. 轉細火，加入番茄粒及Portabello菇炒1分鐘，離火後加牛油及Parmesan cheese拌勻即成。

煎釀孖寶

今日要自己煮飯，不如整煎釀孖寶。

材料:
細冬菇 10隻
魚肉 半斤
生粉 適量
茄子 1條
青椒 1個
堅魚豉油 2湯匙

做法:
1. 用熱水將冬菇浸軟後切粒，然後與魚肉拌勻。
2. 茄子切片，每片既其中一面撲上一層薄薄既生枌，用刀仔將魚肉釀在兩片茄子內，沾有生粉那面要向內，用力壓一壓令魚肉黏實茄子。
3. 青椒切件，內層撲上一層薄薄既生枌，用刀仔將魚肉釀在生枌上。
4. 中火燒紅平底鑊後落油，將已釀有魚肉既青椒及茄子煎至金黃色。可將剩下既魚肉分成一件件煎至金黃色。
5. 伴以堅魚豉油即成。

番茄忌廉汁雞球意粉

下晝約左 Miss 上黎屋企整餅, 午餐就整個意粉佢吃啦!

材料:
(a)
大雞腿 2隻
糖、鹽、生粉、酒、油及蒜鹽 各1茶匙
(b)
意粉 半包
水 半煲
鹽 2茶匙
(c)
橄欖油 4茶匙
番茄(切粒) 1個
乾荵頭(切粒) 1粒
蒜頭(切粒) 3粒
忌廉 100ml
海鹽 半茶匙
黑胡椒碎 半茶匙

做法:
1. 將(a)既大雞腿用鹽水浸至完全解凍後去皮起骨切件，然後加入糖、鹽、生粉、酒、油及蒜鹽拌勻醃一陣。
2. 將(b)既水煲滾，落鹽及已一折為二既意粉，水再滾後將蓋蓋上及熄火，焗20分鐘後倒起過冷河。
3. 燒熱平底鑊，放2茶匙橄欖油落鑊後將雞球炒至表面金黃倒起備用。
4. 將剩下既2茶匙橄欖油落鑊，然後爆香乾荵頭、蒜頭及番茄，將意粉落鑊快炒，加入雞球和忌廉、海鹽及黑胡椒碎，再炒一會至與意粉及雞球完全混和，離火即成。

燕麥臻子軟曲奇

多得安仔上 cooking class 整既曲奇啟發左我，終於整到呢種少甜軟曲奇!!

材料:
牛油 60g
三溫糖 30g
全蛋 半隻
雲呢精華 1茶匙
低筋面粉 40g
臻子粉 20g
泡打粉 5g
原片大燕麥 60g

做法:
1. 牛油和三溫糖稍為打發。加入全蛋及雲呢精華混合。
2. 低筋面粉及發粉過篩，加入1拌幾下後，再加入臻子粉拌勻後加入原片大燕麥，完全混合。
3. 焗盤鋪上牛油紙，用匙羹將粉團放在焗盤上，放入已預熱170度既焗爐焗15分鐘。

香草燒羊鞍配薄荷醬

要買迷迭香，但係買錯左百里香，所以就整燒羊鞍喇。

材料:
(a) 羊鞍
羊鞍 1磅
橄欖油 3湯匙
鮮百里香 1g
鮮薄荷葉 0.5g
鮮迷迭香 0.5g
番茄(細) 1個
海鹽 2茶匙
黑胡椒 2茶匙
霖酒 10ml

(b) 薄荷醬
鮮薄荷葉 0.5g
酸忌廉 100g
砂糖 半茶匙
海鹽 半茶匙

做法:
(a) 羊鞍
1. 焗盆鋪上錫紙，將一半香草、橄欖油及番茄放焗盆上。
2. 洗凈羊鞍後抹乾，放香草上，將餘下既香草、橄欖油及番茄放羊鞍面，灑上鹽、黑胡椒及霖酒，鋪上錫紙後放雪櫃腌三小時。
3. 預熱焗爐220度，將焗盆面既錫紙棄掉，將羊鞍焗10分鐘後反轉再焗10分鐘，將羊鞍上碟即成。

(b) 薄荷醬
1. 將薄荷葉、砂糖及海鹽放攪拌機攪勻即成。

芝士焗 Portabello

琴日行吉之島見到 d portabello 好新鮮，仲特價添，所以即刻買左一 pack 黎整喇!!

材料:
橄欖油 半湯匙
Portabello 1 pack (約4-5個)
蒜鹽 2茶匙
Mozarella 芝士 4片(撕碎)
乾番茜碎(Parsley) 適量

做法:
1. 焗盆上鋪上錫紙，塗上橄欖油。
2. Portabello 洗凈後將菇'定'剪掉，輕輕力將菇身既水份搾乾後放錫紙上。
3. 將蒜鹽均勻地灑於菇上。
4. 將 Mozarella 芝士鋪上，放入已預熱200度既焗爐內焗15分鐘。
5. 將菇從焗爐取出，灑上乾番茜碎即成。

燕窩椰汁大菜糕

繼椰青大菜糕後，另一消暑甜品。呢個仲易整呀!為左令到個甜品更加高檔，糕面加左少少燕窩，wakakaka!

材料:
椰漿 80g
水 5碗
冰糖 120g
大菜 16g
即食燕窩 隨量

做法:
1. 大火將水煲滾，煮容冰糖，將大菜加入煲內煮容後離火。
2. 將椰漿加入煲內與1拌勻，倒入密實盒內放涼，放雪櫃至少3小時即成。
3. 可因應口味加燕窩、花奶或椰汁於糕面同吃。

蒜香洋蔥醬 Onion Garlic Dip

晌 City Super 買過黎點粟米片食，好好味但係都幾貴。不如試下自家製，又ok wor!!

材料:
忌廉芝士(室溫) 250g
橄欖油 半湯匙
洋蔥(切粒) 1個
乾蔥頭(切粒) 1個
蒜頭(切粒) 半個
鹽 1茶匙
糖 半茶匙
黑胡椒碎 半茶匙
番茜碎(Parsley) 適量

做法:
1. 將忌廉芝士用打蛋器打至光滑。
2. 將平底鑊燒紅，落油將洋蔥、乾蔥頭同蒜頭炒至軟身，落鹽、糖同黑胡椒碎調味。
3. 將2放攪拌器內打成茸。
4. 將3倒入1內，用打蛋器將兩者混合後倒入密實盒內，放雪櫃雪凍後將番茜碎鋪上面即成。

牛奶香蕉布甸

呢個係芒果布甸既變奏版。香蕉都係安仔其中一種最鍾意既食物，呢個係同佢增磅既計劃既一部份。因為香蕉容易氧化，所以雪凍後表面有一層薄薄既啡色。

材料:
凍開水 50g
魚膠片 7.5g/3片
牛奶 90g
砂糖 20g(可以省掉)
已熟大香蕉 3條
鮮忌廉 120g
雲呢拿精華 1茶匙
橙酒 5ml

做法:
1. 魚膠片放凍開水浸軟後將水倒掉備用。
2. 將牛奶和砂糖放煲內，用細火加熱至融，加入魚膠片，拌至融化。放涼備用。
3. 香蕉切片與鮮忌廉、雲呢拿精華和橙酒混合，用攪拌機打成泥狀。
4. 將2和3拌勻，倒入布甸模後放入雪櫃雪3小時即成。

芒果布甸

安仔最愛!!

材料:
大芒果 2個
鮮忌廉 80g
牛奶 90g
砂糖 50g
凍開水 50g
魚膠片 7.5g/3片

做法:
1. 將芒果開邊起肉切粒。
2. 魚膠片放凍開水浸軟後將水倒掉備用。
3. 將1個芒果的肉粒與鮮忌廉混合，用攪拌機打成泥狀。
4. 將牛奶和砂糖放煲內，用細火加熱至融，加入魚膠片，拌至融化。
5. 將4放涼後加入3中，加入剩餘的芒果粒拌勻，倒入布甸模後放入雪櫃雪3小時即成。

合桃黑朱古力曲奇

呢個食譜係以燕麥曲奇既藍本改做既，好鬆脆。

材料:
牛油 60g
三溫糖 30g
黑朱古力(切粒) 50g
合桃(切粒) 40g
全蛋 半隻
雲呢精華 1茶匙
低筋面粉 60g
泡打粉 5g

做法:
1. 牛油和三溫糖稍為打發。加入全蛋及雲呢精華混合，再加入黑朱古力粒和合桃粒拌勻。
2. 低筋面粉及發粉過篩，加入1拌至完全混合。
3. 用匙羹分成每個15g圓球，放在焗盤上，用手指壓平，放入已預熱170度既焗爐焗20-25分鐘。

椰青大菜糕

老公上個禮拜已經話想吃，我今日先整比佢吃。

材料:
椰青 1個
水 3碗
冰糖 80g
大菜 16g

做法:
1. 用刀切走椰青頂白色的部分，然後用已清洗乾淨的螺絲批鑿兩個孔，將椰青水倒進碗內隔渣備用。
2. 將椰青一分為二，用匙羹將白色的椰肉刮起，將椰肉上啡色的皮切走後將椰肉切絲。
3. 大火將水煲滾，煮容冰糖，將大菜加入煲內煮容後離火。
4. 將椰青水及椰肉絲加入煲內與3拌勻，倒入密實盒內放涼，放雪櫃至少3小時即成。

斑蘭雪紡蛋糕

材料:
新鮮斑蘭葉 6條
暖開水 80ml
蛋白 3隻
三溫糖 30g
砂糖 50g
低筋麵粉 100g
泡打粉 1茶匙
橄欖油 30ml
蛋黃 3隻

做法:
1. 將剪碎斑蘭葉後加開水，放入攪拌機內攪勻，隔渣備用。
2. 將蛋白用打蛋器打至起泡，加入三溫糖打至企身。
3. 將砂糖、低筋麵粉同泡打粉混合後篩好，加入橄欖油、斑蘭水同蛋黃，用打蛋器打至冇粉粒為止。
4. 將3倒在蛋白上，用膠鏟輕力將之和蛋白完全混合。
5. 將4倒在已鋪上焗爐紙(如無的話可省卻但焗盆要掃上油)既長盆或7吋甩底圓盆內，放入已預熱180C焗爐焗35分鐘即成。

綠茶蜂蜜蛋糕

想食蛋糕，所以就整黎試下。

材料:
低筋麵粉 80g
綠茶粉 1湯匙
蛋 2隻
糖 35g
蜂蜜 2湯匙
乳化劑 1茶匙
橄欖油 1湯匙

做法:
1. 預熱焗爐170度。
2. 將麵粉同綠茶粉混合備用。
3. 將蛋，糖，蜂蜜同乳化劑放大碗內打至杰身。
4. 分兩次篩入麵粉同綠茶粉，用打蛋器輕輕拌勻。
5. 將橄欖油輕力混入4內。
6. 將粉漿倒入模中，放入焗爐焗35分鐘即成。

客家花生紫米粽

近排包粽比亞仔感受下節日氣氛。靠奶奶教路，包左d鹹肉粽。身為客家妹，好想睇下客家粽係點包。於是乎就上網睇下有無食譜可用啦。幾經辛苦，比我找到一個關於客家花生粽既網頁，不過只係得材料，無份量同做法。我唯有自己研究點整啦，又唔錯窩。

材料:
(A)餡料:
剝殼生花生 160g
大乾荵頭(切碎) 4個
蝦乾/蝦米 20g
生油 1/2茶匙
五香粉 2茶匙
砂糖 2茶匙
幼鹽 1茶匙

(B)糯米
白糯米 360g
黑糯米 240g
鹽 6茶匙

(C)粽葉
粽葉 50塊
2呎長鹹草繩/尼龍繩 7條

做法:
包粽前一晚:
1. 將白糯米及黑糯米洗凈後加鹽及蓋過米面既水浸過夜。
2. 將粽葉及鹹草繩洗淨後加水浸過夜。(用尼龍繩不用浸水)

包粽當日:
1. 將浸水中既粽葉及鹹草繩用大火煲滾，轉中火煲10分鐘後用籬將粽葉盛乾，鹹草繩或尼龍繩則由頂撕開，一分為二作14條。
2. 用滾水將蝦乾/蝦米浸軟後切碎。
3. 用白鑊將花生炒香，將花生倒於紙上，用手把花生皮磋走。將已去皮既花生用搞拌機或大玻璃樽弄碎。
4. 燒紅平底鑊，落油，將乾荵頭碎落鑊爆至金黃色後加蝦乾/蝦米炒一炒，加五香粉，砂糖同幼鹽調味，然後將花生碎倒落鑊中與乾荵頭碎及蝦乾/蝦米混合。
5. 將浸糯米既水倒掉，用籬盛乾水。
6. 將一塊棕葉既半邊重疊於另一塊既半邊下(圖1)，然後一同向上對摺(圖2)。將於左手面哪塊葉向內摺(圖3)。摺後會出現一直角。用左手虎口位頂住直角，稍微將葉躺開成一個斗(圖4)。將一大湯匙糯米倒落斗內(圖5，再加入一大湯匙花生餡，然後再倒入一大湯匙糯米。將第三塊葉放於右半塊葉下(圖6)，葉底向上對摺(圖7)。將第三塊葉的右邊向內摺(圖8)。捉緊葉頂後拍一拍葉邊(圖9)，使糯米及餡料更堅實。將葉頂向下摺(圖10)。用繩扎緊(圖11及12)。
7. 將粽放入煲內，加水，水滾後轉中細火煲2小時15分鐘，離火後立即將水倒掉，因粽葉長時間浸如熱水內容易變黑。

(圖1)

(圖2)

(圖3)

(圖4)

(圖5)

(圖6)

(圖7)

(圖8)

(圖9)

(圖10)

(圖11)

(圖12)

紅藍梅乾燕麥曲奇 (Revised on 23/06/10)

今日發現左一個整好好味既麥片曲奇食譜，亞仔好鍾意食。
我稍為調整左少少，將提子乾變左紅藍梅乾，加左雲呢精華同將黃糖變左三溫糖。
(整過幾次後，而家個食譜同最初個已經唔同曬。)

材料:
牛油 60g
三溫糖 30g
紅藍梅乾(切細) 各25g
全蛋 半隻
雲呢精華 1茶匙
低筋面粉 60g
泡打粉 5g
原片大燕麥 70g

做法:
1. 牛油和三溫糖稍為打發。加入全蛋及雲呢精華混合，再加入紅藍梅乾。
2. 低筋面粉及發粉過篩，加入1拌幾下後，再加入原片大燕麥，完全混合。
3. 用匙羹分成每個15g圓球，放在焗盤上，用手指壓平，放入已預熱170度既焗爐焗20分鐘。

發現食譜既網址: http://hkplants.com/thread-32044-1-1.html

煎肉碎蛋餅

材料:
豬肉碎 10元(用一半)
雞蛋 2隻
荵(切粒) 1條

醃料:
糖 1茶匙
油 2茶匙
生粉 1茶匙
燒酒 1茶匙
雞粉 1茶匙
豉油 1茶匙

做法:
1. 將醃料放豬肉碎內拌勻。
2. 將雞蛋同荵粒放豬肉碎內拌勻。
3. 中火燒紅平底鑊，加油，將肉碎蛋漿一湯匙一湯匙地倒落鑊度煎，每湯匙之間要隔開少少。
4. 將蛋餅上下反轉煎至金黃色即成。

馬豆糕

好耐無整既一款港式糕點，色澤比晌街買既偏黃係因為用左花奶。

材料:
清水 3碗
馬豆 1/2碗
冰糖 80g
椰漿 1罐(細)
花奶 1罐(細)
粟粉 120g
凍開水 1碗

做法:
1. 大火煲滾清水，將已洗凈既馬豆同冰糖放落水中煲至大滾，蓋上蓋後轉細火煲20分鐘。
2. 加入椰漿同花奶，轉中大火煲滾，不用蓋上蓋。
3. 用碗將粟粉同凍開水拌勻至無粉粒，一邊加入煲內，一邊用筷子在煲內搞動，直到煲內既液體變漿糊狀。
4. 離火後將馬豆糊倒入密實盒內，放涼後放入雪櫃雪凍即可。

芒果椰汁黑糯米

近排d芒果當灶，屋企仲又d黑糯米未食曬，所以就整左黎做今晚既飯後甜品喇!

材料:
黑糯米/紫米 100g
白糯米 50g
水 1 litre
冰糖 55g
椰汁 隨意
芒果 隨意

做法:
1. 洗凈黑糯米和白糯米，用麵煲將1 litre水煲滾。
2. 中大火煲黑糯米和白糯米20分鐘，再用細火煲30分鐘。
3. 加入冰糖，輕輕拌勻，離火後將黑糯米和白糯米倒入密實盒中，待涼後放雪櫃雪凍。
4. 芒果去皮切粒。
5. 於碟上放一些凍糯米，淋上椰汁和放上芒果粒即成。

醬油炆排骨

又係亞媽既真傳,不過我第一次整,都唔錯架,送飯一流呀!

材料:
赤邊排骨 12兩 (因為晌百佳買既,所以一pack唔夠一斤,如果晌街市買既話,可買一斤)
蒜頭 2粒
乾荵頭 1粒
生油 2湯匙
燒酒 2湯匙
生抽 2湯匙
老抽 2湯匙
水 1.5-2碗
片糖 半塊

做法:
1. 將蒜頭同乾荵頭切片。
2. 燒熱易潔煲(煮麵用哪種)後放生油，燒熱生油後將蒜頭同乾荵頭放煲內爆香。
3. 將排骨放入煲內爆至轉色，其間用木或膠鑊鏟不停攪拌，以免癡底。
4. 倒入燒酒，待排骨吸收一會兒後將生抽同老抽倒入煲內。
5. 將水倒入煲內，水須蓋過肉面，煮滾後放片糖煮溶。
6. 轉細火炆約1小時後離火即成(炆到咁上下記得睇下夠唔夠水)。

腐竹蛋白糖水

突然想食糖水潤下喉,好彩屋企有腐竹同蛋白,煲腐竹蛋白糖水食下啦!

材料:
水 750毫升
腐竹 1片
冰糖 55克
蛋白/雞蛋 2隻

做法:
1. 將水放煲內用大火煲滾。
2. 腐竹於筲箕內弄碎，用水洗一洗後放滾水內煲滾，轉細火煲10分鐘。
3. 將冰糖放腐竹水內煮溶。
4. 轉大火將糖水煮滾後關火，立即將蛋白/雞蛋(可將雞蛋於碗內先打勻)倒入糖水內拌勻即成。

日式豆腐沙律

買左件絹豆腐，本來諗住整 mousse 蛋糕，但係雪櫃件朱古力蛋糕仲未食曬，所以用黎整冷盆喇。好易整架咋，最適合要返工既師奶整。

材料:
絹豆腐 1件(亦可用山水盒裝滑豆腐)
日式燒汁 2湯匙
醋 2湯匙
日式豉油 2湯匙
麻油 1湯匙

荵花 隨量

做法:
1. 將豆腐盒內既水倒丟，用熱水沖一沖後放碗內。
2. 將日式燒汁，醋，日式豉油同麻油於飯碗內混成汁料，然後倒入豆腐內。
3. 灑上荵花即成。

客家炆豬肉

呢味送我由細食到大，係亞媽教我整既。

材料:
油 1湯匙
豆豉 1湯匙
蒜頭粒 1湯匙
五花腩/梅頭 1斤(切件，每件約兩隻手指頭大)
燒酒 2湯匙
南乳 1-1.5塊
片糖 半塊
豆腐噗 半斤
鹹酸菜 半個切片(泰國o個種會甜d)
荵 兩棵(切段)

做法:
1. 用中大火將鑊燒紅後落油，爆香蒜頭粒同豆豉。
2. 爆香五花腩/梅頭，快手炒至肉面變色，轉中火，將南乳落鑊炒一炒後落燒酒，再炒。
3. 加水，水要蓋過肉。
4. 見到南乳汁開始滾就落片糖，蓋上鑊蓋，轉細火炆50分鐘。(每隔15分鐘開蓋睇一睇會唔唔會炆乾水，唔夠水就加滾水)
5. 將豆腐噗用滾水沖一沖去除油膩，然後連同鹹酸菜落鑊，炒1分鐘後蓋上鑊蓋，再炆10分鐘。(留意水位，唔夠水要加滾水)
6. 將荵加入鑊內，炒1分鐘，離火即成。

黑豆漿

今次整得無上次咁濃，應該係落多左水。以下既食譜已經調整左水既份量，整出黎既豆漿會好濃架!

材料:
黑豆 1飯碗
水 2.5公升
砂糖 6湯匙

做法:
1. 用1公升水將黑豆浸過夜。(或用暖水浸3小時)
2. 將1/3黑豆連浸豆水放入攪拌機打成茸。
3. 將煲魚湯袋置煲內，將黑豆茸倒入煲魚湯袋內。
4. 把袋口索緊後用力將豆茸既水份搾入煲內，將已搾乾既豆茸棄丟。
5. 重覆步驟3和4。
6. 將餘下既1.5公升水倒入煲內後可用篩將豆漿面既泡泡撈走。
7. 用大火將豆漿煲滾。(切勿蓋上煲蓋，因豆漿好容易會滾瀉)
8. 轉細火煲45分鐘，加入砂糖拌勻即成。

豆沙鍋餅

想將冰箱裡面既豆沙消滅，不如試下整豆沙鍋餅啦!

材料:
麵粉 50g
糯米粉 20g
雞蛋 1隻
砂糖 1湯匙
生油 1茶匙
水 70g
豆沙 適量

做法:
1. 將麵粉同糯米粉混合。
2. 雞蛋用叉發好後，連同砂糖，生油及水混入麵粉同糯米粉內，用木匙拌勻至無粉粒為止。(如拌來拌去都仍然有粉粒的話，可將麵糊過篩)
3. 平底鑊放爐上，開細火，加少許生油，於鑊內趟一趟後，將生油倒起。
4. 用湯殼將一殼粉糊倒入鑊內，快手趟開。(好似pancake咁)
5. 將豆沙置於枌皮中央，然後將枌皮既四面向內摺，成一長方形，將之反轉略略煎一煎，倒起備用。
6. 重複步驟3至5直到所有麵糊用完。
7. 將所有鍋餅放回平底鑊，用中火煎至兩面香脆便成。

Reference: http://irenechanwai.mysinablog.com/index.php?op=ViewArticle&articleId=520152